پاڪستان پيپلز پارٽي (پي پي پي) جي چيئرمين بلاول ڀٽو زرداري چيو آهي ته جڏهن به مشڪلاتون ٿينديون آهن ته اسان مولانا صاحب جي تجربي مان فائدو وٺندا آهيون، ۽ مولانا فضل الرحمان جي ثالثي واري پيشڪش مان فائدو ورتو وڃي.
اسلام آباد ۾ مولانا فضل الرحمان سان گڏ پريس ڪانفرنس ڪندي بلاول ڀٽو زرداري چيو ته اسان سڀني جي خواهش آهي ته آزاد ڪشمير جو مسئلو حل ٿئي.
هن چيو ته اهڙو ماحول پيدا ڪرڻ جي ڪوشش ڪئي پئي وڃي ته جيئن آزاد ڪشمير جو بحران حل ٿي سگهي. اهو تمام ضروري آهي ته آزاد ڪشمير ۾ چونڊون صاف ۽ شفاف ٿين.
بلاول ڀٽو زرداري چيو ته ڪشمير جي صورتحال بابت پارليامينٽ هائوس ۾ به ڳالهه ٻولهه ٿي آهي، اسان چاهيون ٿا ته آزاد ڪشمير جي مسئلن جو حل نڪري.
هن وڌيڪ چيو ته پيپلز پارٽي ۽ جي يو آءِ کي تحريڪون هلائڻ جو تمام سٺو تجربو آهي، ۽ اسان مولانا فضل الرحمان کان سياسي طور تي مدد وٺندا رهون ٿا.
پيپلز پارٽي جي چيئرمين چيو ته اسان حڪومت کي تجويز ڏني آهي ته مولانا فضل الرحمان جي ثالثي واري پيشڪش مان فائدو ورتو وڃي. ڪشمير جون چونڊون غير متنازع هجڻ تمام ضروري آهي.
ان موقعي تي ڳالهائيندي مولانا فضل الرحمان چيو ته قومي معاملن ۾ اهڙيون حالتون پيدا ٿينديون آهن جن جي ڪري هڪ ٻئي سان رابطا ٿيندا رهن ٿا.
هن چيو ته آزاد ڪشمير ۾ ايڪشن ڪميٽي ڌرڻو هڻي ويٺل آهي، هن ڪميٽي مون کي ثالثي جي پيشڪش ڪئي، ۽ بلاول ڀٽو پارليامينٽ ۾ منهنجي ثالثي جي حمايت ڪئي.
سندس چوڻ هو ته حڪومت ۾ به بلاول ڀٽو موجود آهي، وزيراعظم ڏانهن به پيغام وڃي رهيو آهي، اميد آهي ته وزيراعظم مثبت قدم کڻندو.
بلاول ڀٽو زرداري جو هتي اچڻ هڪ اڳڀرائي آهي، ۽ 12 سيٽن جو معاملو ڳالهين جي ميز تي طئي ڪيو ويندو.
