رائٽرز موجب ڪجهه اهلڪارن کي صلاح ڏني وئي آهي ته اهي اربع شام تائين قطر ۾ موجود آمريڪي فوج جي الِ عديد ايئر بيس مان نڪري وڃن۔ هي قدم ان وقت سامهون آيو آهي جڏهن واشنگٽن خبردار ڪيو آهي ته هو ايران ۾ مظاهرين جي تحفظ لاءِ مداخلت ڪري سگهي ٿو۔
دوحا ۾ آمريڪي سفارتخاني طرفان فوري طور ڪو به تبصرو سامهون ناهي آيو، جڏهن ته قطر جي پرڏيهي وزارت پڻ رائٽرز جي تصديق يا تبصري واري درخواست جو فوري جواب نه ڏنو آهي۔
الِ عديد وچ اوڀر جو سڀ کان وڏو آمريڪي فوجي اڏو آهي، جتي لڳ ڀڳ 10 هزار فوجي موجود آهن۔
هڪ سفارتڪار رائٽرز کي ٻڌايو ته هي فيصلو قطر ۾ آمريڪي فوجي اڏي بابت سيڪيورٽي خدشن کي نظر ۾ رکندي ڪيو ويو آهي۔ هن چيو ته هي هدايت احتياطي تدبير طور ڏني وئي آهي، جڏهن ته مڪمل انخلا جو ڪو به اعلان ناهي ڪيو ويو۔
رائٽرز جو چوڻ آهي ته آمريڪي اختيارين حالتن جو جائزو وٺڻ کانپوءِ محدود سطح تي قدم کنيو آهي۔ آمريڪي ۽ قطري اختيارين پاڻ ۾ رابطي ۾ آهن ۽ سيڪيورٽي صورتحال تي نظر رکي وئي آهي۔ قطر ۾ آمريڪي فوجي اڏي کي علائقي ۾ آمريڪا جي هڪ اهم اسٽريٽجڪ تنصيب سمجهيو وڃي ٿو۔
هڪ سينيئر ايراني عملدار اڳ ۾ رائٽرز کي ٻڌايو هو ته تهران علائقائي ملڪن کي خبردار ڪيو آهي ته جيڪڏهن واشنگٽن طرفان حملو ڪيو ويو ته ايران آمريڪي فوجي اڏن تي حملو ڪندو۔ ياد رهي ته هي ڌمڪي آمريڪي صدر ڊونلڊ ٽرمپ طرفان ايران ۾ مداخلت جي ڌمڪي کانپوءِ سامهون آئي آهي۔
گذريل سال آمريڪا طرفان ايران تي فضائي حملن کان هڪ هفتي کان وڌيڪ اڳ وچ اوڀر ۾ موجود آمريڪي اڏن تان ڪجهه اهلڪارن ۽ انهن جي خاندانن کي منتقل ڪيو ويو هو۔ جون ۾ آمريڪي حملن کانپوءِ ايران قطر ۾ هن اڏي تي ميزائل حملو پڻ ڪيو هو۔
