پاڪستان

January 5, 2022 11:54 am

بلوچستان ۾ گذريل ڏينهن ڳڙي سان گڏ پيل برسات تباهي مچائي ڇڏي

سموري ملڪ ۾ سياري جي برسات جو سلسلو جاري آهي، بلوچستان ۾ گذريل ڏينهن ڳڙي سان گڏ پيل برسات تباهي مچائي ڇڏي آهي،

جبلن مان نئيون وهي اچڻ سبب گوادر سميت مختلف شهرن ۾ ٻوڏ واري صورتحال پيدا ٿي وئي آهي.

رپورٽس مطابق برسات سبب هيٺيان علائقا پاڻيءَ هيٺ اچي ويا ۽  ڪيترائي ڪچا گهر ڊهڻ سبب متاثر کليل آسمان هيٺ ويٺل آهن.

برسات جي تباهين کانپوءِ  گوادر ۾ ايمرجنسي لاڳو ڪئي وئي آهي، چمن ۾ هڪ سئو کان وڌيڪ گهرن ۽ اسڪولن کي نقصان پهتو آهي.

پاڪ فوج جون گوادر، پسني، تربت ۽ ڪوسٽل هاءِ وي جي ڀرپاسي وارن علائقن ۾ امدادي ڪارروايون جاري آهن.

موسميات کاتي پاران بلوچستان ۾ اڄ ٻيهر تيز برسات جي اڳڪٿي ڪئي وئي آهي،جڏهن ته ڪوئيٽا، زوب ۽ زيارت ۾ برفباري ۽ برسات بعد رت ڄمائيندڙ ٿڌ ٿي وئي.

ٻئي طرف گلگت بلتستان، آزاد ڪشمير ۽ اسلام آباد ۾ وقفي وقفي سان برسات ۽ برفباري جو سلسلو جاري آهي.

گلگت بلتستان جي علائقي استور ۽ غذر سميت ٻين علائقن ۾ برفباري بعد مختلف علائقن کي ملائيندڙ روڊ بند ٿي ويا آهن.

ڪيترن ئي علائقن ۾ سوين گاڏيون ڦاسي پيون آهن،  رحيم يار خان، راجنپور، ملتان، لاهور، اسلام آباد سميت مختلف علائقن ۾ به وسڪارو جاري آهي.

هوڏانهن دير بالا، چلاس، نانگا پربت، ڪوئيٽا، چمن، زيارت ۽ قلات ۾ به برفباري جو سلسلو جاري آهي..

وڌيڪ پڙهو: