بندش وڌل تنظيم ٽي ايل پي جو احتجاج ستين ڏينهن ۾ داخل ٿي ويو، مارچ ڪندڙ اسلام آباد ڏانهن وڌڻ لڳا.
ذريعن مطابق ڪامونڪي شهر ۽ جي ٽي روڊ تي ڪاروباري مرڪز بند آهي،دوڪانن ۽ ريسٽورنٽس کي سيل ڪيو ويو آهي.
جي ٽي روڊ ۽ ڀرپاسي جي علائقن ۾ سرڪاري ۽ خانگي ادارا به بند آهن،صورتحال تي ڪنٽرول ڪرڻ لاءِ شهر ۾ انٽرنيٽ سروس به معطل آهي.
چناب پل ڀرسان جي ٽي روڊ تي خندق کوٽي وئي،ڪنٽينر به رکيا ويا،خندق کوٽڻ سبب وزير آباد ۽ سيالڪوٽ ۾ زميني رابطو ڪاٽيو ويو.
ٻئي طرف وفاق ۽ پنجاب وچ ۾ رينجرز جي مقرري بابت رولز آف انگيجمينٽ طئي ڪيا ويا آهن.
پنجاب حڪومت گهرو کاتي ذريعي رينجرز ۽ پوليس جي مجموعي مقرري ڪندي.
ذريعن مطابق رينجرز ۽ پوليس کي مناسب جسماني ۽ آتشي هٿيارن جي استعمال جي اجازت هوندي،حملي جي صورت ۾ قاعدن تحت هر ڪو پنهنجي تحفظ جو حق رکي ٿو.
فورسز کي حملي جي نيت سان ڪيل فائر جو جواب ڏيڻ لازمي هوندو آهي،رينجرز ۽ پوليس کي شرپسندن پاران حملي جي صورت ۾ سندن تحفظ مقامي ڪمانڊ جي ذميداري آهي.
ذريعن مطابق ڪمانڊ خطري جي مناسبت سان آتشي هٿيارن جي استعمال جي اجازت ڏئي سگهي ٿي.
