جوهي، ڦلجي اسٽيشن ۽ ڦل ۾ اسڪولن جي ڇتين جا چاپڙ ڪِري پيا، جنهن دوران 3 استاد زخمي ٿي پيا، استادن ۽ شاگردن احتجاجي مظاهرا ڪري اسڪولن جي مرمت ڪرائڻ جو مطالبو ڪيو آهي.
جوهي ڀرسان هاءِ اسڪول ڪمال خان جي اسٽاف روم جي ڇت جا چاپڙ ڪِري پيا، جنهن جي نتيجي ۾ 3 استاد اعجاز لُنڊ، پيرل لُنڊ ۽ علي مظهر رند زخمي ٿي پيا، جن کي جوهي تعلقي اسپتال منتقل ڪيو ويو.
ڦلجي اسٽيشن ڀرسان خان محمد آباد بوائز هاءِ اسڪول پيارو ۾ به پڙھائي دوران ڇت جا چاپڙ ڪِري پيا، جنهن دوران شاگردن ۾ ڪيهاٽ پئجي ويا،
اسڪول جي مرمت نه ڪرائڻ خلاف استادن ۽ شاگردن احتجاج ڪندي دانهيو ته اسڪول جا چاپڙ ڪِرڻ روز جو معمول بڻجي ويو آهي، بار بار دانهڻ باوجود اسڪول جي مرمت نه ٿي ڪرائي وڃي.
ڦل ۾ به پرائمري اسڪول غلام حسين سومرو جي اسڪول جي ڇت جا چاپڙ ڪِري پيا، جنهن دوران شاگرد معجزاڻي نموني بچي ويا.
اسڪول جي استادن ۽ شاگردن احتجاجي مظاهرو ڪري دانهيو ته تازين برساتن سبب اسڪولن جون عمارتون زبون حال بڻجي وئي آهي، چاپڙ ڪِرڻ سبب شاگردن جون حياتيون خطري ۾ پئجي ويون آهن.
